Academischen Adviesraod

Es oonderdeil vaan de academie is ’nen Academischen Adviesraod opgezat gewore. Väöraonstaonde spraokkundige helpe us mèt advies en stiepe versjèllende aspekte vaan eus werk. Hun hölp is cruciaol veur de wijeroontwikkeling vaan dit projek. De participatie vaan väöraonstaonde linguïste hölp us ouch veur lui en foondse te werve in Limbörg veur nao ’n succèsvol aofsleting vaan dit projek touw te wèrke. Veer wèlle daan ouch gere taolkundige mèt ’n bizunder intrèsse veur Limbörgs of regionaol of minderheidsspraoke en die wèlle mètwèrke aon dit projek nuje veur kontak mèt us op te numme.

Veer zien zier verierd tot oonder aandere Orrin W. Robinson, perfesser op de Amerikaonse universiteit vaan Stanford, John McWhorter, perfesser op ’t Manhattan Institute in New York, en Michiel de Vaan vaan de Universiteit Leide lidmaotsjap vaan euzen Academischen Adviesraod aongenomen höbbe.

Orrin W. Robinson is sins 1982 perfesser bij ’t Department of German Studies vaan Stanford University. Heer heet ziene Bachelor of Arts gehaold bij Stanford University en heet ziene Master of Arts gehaold en is gepromoveerd bij Cornell University. E deil vaan zie promotie-oonderzeuk waor euver de klanklier vaan ’t Limbörgs.
Perfesser Robinson is lid vaan ’t Executive Committee vaan de Amerikaonse Society for Germanic Linguistics en de Adviesraod vaan de American Journal of Germanic Linguistics and Literatures, ’ne referee veur de oetgeverije Routledge, Stanford University Press en Cambridge University Press, zoe woe versjèllende taolkundige tiedsjrifte euver Germaonistiek. In jannewarie 2007 heet heer lidmaotsjap vaan euzen Academischen Adviesraod geaccepteerd.
Ein vaan zien väöl publicaties is oonder andere Old English and its Closest Relatives: A Survey of the Earliest Germanic Languages, wat door de Stanford University Press in 1992 oetgegeve is gewore. Ei chapiter vaan dit book geit euver de Wachtendonck Codex es de vreugsten teks in de Limbörgse taol.

John H. McWhorter is Senior Fellow bij ’t Manhattan Institute. Heer promoveerde in de taolkunde bij Stanford University in 1993 en woort beneump tot geassocieerd perfesser in de spraokkunde bij UC Berkeley nao oonderwies bij Cornell University gegeve te höbbe.
John McWhorter sjrief en gief oetveurig commentaar euver ras, ethniciteit en cultureel kwesties veur ’t Manhattan Institute zie Center for Race and Ethnicity. Daoneve is heer ’ne väöraonstaonde linguïs en sjriever vaan The Power of Babel: A Natural History of Language, euver wie de spraoke vaan de wereld oontstoon, veranderen en z’ch mingele, en Doing Our Own Thing: The Degradation of Language and Music in America en Why We Should, Like, Care. Heer heet ouch beuk gesjreve euver dialekte en Black English, genaomp The Word on the Street, en drei beuk euver Creoolspraoke.
Vaanwege zien intrèsse in regionaol en minderheidsspraoke en hun behaajd heet heer in jannewarie 2007 lidmaotsjap vaan euzen Academischen Adviesraod aongenome.

Michiel de Vaan is Universitair Docent aon de Universiteit Leide. Heer onderzeuk wie taol verandert, en wat de taol us zeet euver de gesjiedenis vanne sprekers. Zie vakgebeed zien alle Indo-Europese taole, van ’t Keltisch in ’t weste bis ’t Sanskrit in India. Heer promoveerde op ’t Avestisch (de taol van Zaratoestra), onderzeuk de ajdste tekste in ’t Albanees, en heet ’n etymologisch woordebook van ’t Latien gesjreve: Etymological Dictionary of Latin and the other Italic languages (2008).
Michiel de Vaan is ‘ne vaste mètwèrker aon ’t nui Etymologisch woordenboek van het Nederlands, en wèrk aon e groeter onderzeuk euver de ajdste bronne veur ’t Nederlands, van veur ’t jaor 1200.
Ouch sjrief heer regelmaotig artikele euver de etymologie van Limbörgse wäörd, euver de sleiptoen enne stoettoen, en euver awwer vörm van ’t plat. Heer is wijer bestuurslid vanne Belsj-Nederlandse Vereniging voor Limburgse Dialect- en Naamkunde. In Leiden heet ‘r twie kier e college Limbörgs gegeve, meh det heet hielaos nog neet veur ’n Limbörgse boom inne Randstad gezörg...
Vaanwege zien intrèsse in 't Limbörgs heet heer in november 2008 lidmaotsjap vaan euzen Academischen Adviesraod aongenome.